اؤیکو

"دهشتلی سس سیزلیک"

هاوا قاران قلو قدور،قیش مئهی داغلار  اته ین اوزونه بورویوب، آغاجلاری بیر لای قار به زه یبدیر . ایرماق قیشین بوگونونده هله ده آخیر . دایانیرام ،سویا گوز تیکیرم ."نه شاشیدیریجی،سو دونمایب!"دییه یوللانیرام.بیر قوش دا گؤیده اوچماییر.دیه سن توم قوشلار بیرلیقدا یولجولوقا قرارلاشیبلار .تکه توک بیر اولدوز بو قاران قلوق هاوادا بولودلار آخاسیندا چیخیر،گؤز وورور، یئنه گؤی دنیزینده جومور."بیر بو قدر سس سیزلیک نه دندیر ؟!"دییه بیرآغیر غریب لیقی ائله بیله سن ایچریمده داشیماغا باشلایرام ، حس ائدیرم دامارلاریمداکی قانلار یوللارین ایتیرن کیمی دیر . "اووه نفسیم نه آغیر گلیر گئچیر !" اینیمده کی پالتومون اوست دوگمه سین آچاراق سرین یئل جانیما هوجوملاییر . دؤره،  بره گؤز دولاندیریرام. "نده ن بیر سس یوخ؟!"یئلین سسی قولاغلاریمین آرخاسیندان اولایان  قورد  تک  فیریلدایب گئچیر . تکه توک آرابالار گلیب گئچیر  لر . یئنه هر یئر سوسقون ،....

                                            ***

باغیریرام اوجادان،اوجادان،ائولرین سؤنوک چیراغلاری  ایشیقلانیر، باغلانان قاپی پنجره لری آچیلیر،اینسانلار باشی ائشیه بویلانیر ، آرابالار بیردن ترمزائدیب دایانیر لار،هه اولدوزلار گؤیو بورویورلر! -یولداش نه اولوب ؟! پالتومون اوست دویمه سین باغلایب گولومسه نیرم .

-هئچ، سس سیزلیک دن اور گیم سیخیلمیشدی دا....!

بو دوشونجه ده قولاغلاریمین آرخاسیندا اولاییر. آجی گولومسه نیرم .

بیر قارا قوش دا اوچماییر ،بو درین  اؤزلویومو  پوزا. بیر درین دهشت اور گیمده یئر آچیر .

                                           ***   

چوخ اوزاقدان قادینا اوخشار بیر کس گلیر . سئوینیرم آددیم لاریمی اوجا ،بویوک  گوتورورم،اونا چاتا بیله م، بلکه او بیر سس دیر کی منه بوتون اولایلاری آچیغلایاجاق  بیرقارا چادرالی، اؤزون   قارا شالیله توتان بیر قادین .

گولومسه نیب ،درین ماراقلا بیر سؤز آچماق اوچون سورورام "اوزور ایسته ییرم ..."

سوزدیلیمده آغزیم قیفل لانیر ، باغیریرام "خانیم ...خانیم..."

قادین سایمایاراق ائله بیله سن هئچ منی گؤرمه ییب ،دویماییب کیمی مندن اولدوقجا اوزاقلاشیر بیر دن اینسانلار ایلغیم  تک  مندن اوزاقلاشیرلار من قاچیرام و چاتا بیلمیرم ،یورغونلوق  توم   وجودومو بورویور ،باشیم گیجه لیر ،بو آغیر رویادان تئز لیکجه قورتولماق اوچون  یئیین باشیمی ترپدیرم !اؤرگیم دلی تک دؤیونور،  قاچا- قاچا   دوغرو یولا ساری قاچیرام .

"بلکه  بیر سس ... سس؟!" یالنیز تاکسی لار هر دن گؤرونورلر.هانی سوروجولری ؟!...سوروجو؟!... هانی... .

تاکسی لار   سوروجوسوز   هایانا گئدیرلر ، اونلاری کیم سورور؟!

نفسیم بنده گلیر ،... سو...رو... .

                                         ***

گؤزلریمی یوموب آچیرام بیر تاکسی آیاغلاریمین یانیندا دایانیب ،

گؤزله ریمی   قووزاییب  اوسته باخا بیلمه یرم،" بلکه یئنه  سوروجو،... اوندا نه ائدیم ،بیر دن بوتون بو یووارلیق یئردن ،اؤزومو گؤرورم،کیمسه یوخ ،... آدم ، حوا،... تورپاق یا کی ایلک میمون،...من کیمیدیم،هاردایدیم دوندن بئله یه  نه اولدو؟!

 بلکه بو یووارلیق یئرین ،سونو گلیب ،بلکه من اونودولموشام ...،اوندا من...بلکه اولموشم  و تک  بوراخیلمیشام..."

                                         ***

تاکسی دایام ،سوروجو هه  قوجا بیر کیشی ،نه سیزلی  گوزگودن منه باخیر ،

"یوخ من دلی دئیله م،یالنیز بو گون ،یوخ ایره لی گوندن ...صاباحدان..."

سوروجو یئنه باخیر ،هئچ دانیشمایر.

" کاش ائده بیله یدیم اونا ال ویرام!"

الیمی اوزالدیرام ،گوزگودن یئنه باخیر . اوتوراق یئریمین آشاغیسیندان الیمی اونا ساری اوزالدیرام،

"من اولو یم یانی؟...نده ن بویله یم ؟!...بیر هفته اونجه بویله دئیل دیم ،یا کی،..."

هیزلی یولا باخیرام . اؤزومو لمس ائدیرم ،حیس ائدیرم،تاکسی نین قاپی سی ،اوتوراق یئریم،سوروجو،... .

گئدیینیز یئر هارادیر؟!"

بو نو ائشیدیرکن،گوزگودن اونا باخیرام ،  یانی   من  گئدییم  یئرین آدین باجارمیرام،پس نده ن اونا  آنناتا  بیلمه یرم؟!

-"گئدیینیز یئر هارادیر؟!

-هه،هه ... بیر آز قاباغلیق انه جه یم "  دییه راحاتلاییرام . او منی  دویور،نه ده نسه باشلادیم اونونلا دردلشمه یه .

"بیلمه یرم سیزه ده بئله گلیر ،هر یئر سس سیز لیگه جوموب .غریب اولوبدور ،دون بئله دئیلدی،اوره گیم پارتلاییر،...آمما بو آرابالاری

گوره ر کن ،سیز منی دویار کن ،بیر آز ساکین لشیرم ... . بوغولوردوم والاهی،بیر قادین ..."

"بویرونوز!"خیمیر، خیمیراونا گوز تیکدیم .اوره گیمدن درینجه آرزولادیم ،کاشکی یول داها اوزاق اولایدی . کرایه سین اوده یب ،اندیم .

او منه قولاق آسمیشدی؟!

دولا شارکن بیر توکانین ایشیقی منی ماراقلاندیردی ،دایانیب پارلایان بولورلارا گؤز تیکدیم ،ایچه ریه گئچدیم :"گون آیدین ،نه گؤزل بولورلارینیز وار ،ایشیقلاری اینسانی دویغولاندیریر."

کیشی باشی آشاغا اؤزونه مشغول دور.

آیاق اوجوندا ،قایدیرام ،قاپیدان ائشیه چیخیرام ،    بیلمه ییرم هارا!

-"هه دئییردیم ،ائودن چیخدیم ،هر یئر سس سیز ،..."

خیاوانین اوبیری تایندان  بیریسی منه باش ترپه دیر، نه قدر منه

 اوخشایر !

 یئل داها دا  دهشتلی قولاغلاریمین آرخاسیندا اولایر .

قولاغلاریمین تارلاری  بومبا  تک  سسله نیر و داها هئچ بیر شی ،هئچ بیر شی   دویمورام!

"اولدوز صادق-80"